У панядзелак у Пінкавічах правялі раённае фальклорнае свята «Велікодныя веснавыя карагоды».
Святочная пляцоўка размясцілася каля народнага літаратурна-краязнаўчага музея Якуба Коласа. Адкрыла мерапрыемства старшыня Пінкавіцкага сельвыканкама, дэпутат раённага Савета дэпутатаў Анжаліка Гудкова.
У праграме былі сустрэчы з лепшымі калектывамі аматарскай творчасці і майстрамі дэкаратыўна-прыкладнога мастацтва раёна, гульні для дзяцей, экскурсіі ў музей.
Яркім момантам мерапрыемства стала дэфіле традыцыйнага касцюма Піншчыны. Восем святочных і паўсядзённых варыянтаў адзення палескай вясковай жанчыны заварожвалі прыгажосцю, напаўнялі пачуццём гонару за свой край.
Не меней эмацыянальна гледачы сустракалі народны фальклорны калектыў «Грымата» Дабраслаўскага СДК і дзіцячы фальклорны калектыў «Вяночак» Боркаўскага СК, удзельнікі якога з захапленнем займаюцца старадаўнімі танцамі. Дарослыя і юныя артысты запрасілі ўсіх патанчыць з імі.
Цэнтральнай падзеяй дня стала дэманстрацыя элемента свята «Традыцыя веснавых карагодаў на Вялікдзень, Праводную нядзелю і «Провады зімы» ў вёсцы Пінкавічы» – аб’екта нематэрыяльнай культурнай спадчыны, уключанага ў Дзяржаўны спіс гісторыка-культурных каштоўнасцей Рэспублікі Беларусь.
Гэтае традыцыйнае мясцовае свята захоўваюць і штогод праводзяць вечарам у панядзелак праз тыдзень пасля Вялікадня. З песнямі і карагодамі жыхары і госці вёскі заводзяць «танок» (карагод). Рухаючыся да ракі, удзельніцы абраду спыняюцца на скрыжаваннях дарог, каб зноў і зноў завесці карагоды. Разарваўшы «путы» зімы (нацягнутыя праз дарогу вяроўкі), шэсце кіруецца да ракі, каб паваражыць на расліне, які будзе год. Пасля, вяртаючыся назад, удзельнікі свята спяваюць ужо Траецкія песні, каб хутчэй пачалося лета.
Гэты ўнікальны абрад захоўваюць і ўвасабляюць фальклорна-этнаграфічны калектыў «Крыніцы» і ўдзельнікі аматарскага аб’яднання «Крынічанькі» Пінкавіцкага сельскага Дома культуры.
За ўдзел у раённым свяце «Велікодныя веснавыя карагоды» і значны ўклад у папулярызацыю нацыянальнай культуры дыпломамі аддзела культуры Пінскага райвыканкама ўзнагароджаны
- Цэнтр творчасці дзяцей і моладзі Пінскага раёна (дырэктар Ала Лявошка)
- аб’яднанне па інтарэсах «До-мі-солькі» Пінкавіцкай сярэдняй школы імя Якуба Коласа (кіраўнік Людміла Дайнега)
- народны аўтэнтычны фальклорны калектыў «Крыніцы» Пінкавіцкага СДК (кіраўнік Святлана Калодзіч)
- аматарскае аб’яднанне «Крынічанькі» Пінкавіцкага СДК (кіраўнік Ігар Нехайба)
- народны ансамбль народнай песні «Рабіначкі» Стытычаўскага СДК (кіраўнік Ігар Лохач)
- народны ансамбль народнай песні «Верас» Малоткавіцкага ЦСДК (кіраўнік Вікторыя Дзмітраковіч)
- народны вакальны ансамбль «Явар ды каліна» Жабчыцкага СДК (кіраўнік Марыя Паўловіч)
- дзіцячы танцавальны калектыў «Вяночак» Боркаўскага СК (кіраўнік Галіна Банцэвіч)
- народны фальклорны калектыў «Багатуха» Каменскага СДК (кіраўнік Алена Саланевіч)
- вакальны гурт «Вербніца» Аснежыцкага РЦКіВЧ (кіраўнік Святлана Стасевіч).
Дыпломы ўручыла дырэктар Пінскай раённай цэнтралізаванай клубнай сістэмы Наталля Вількоўская.
Фотарэпартаж
Людміла РЭБКАВЕЦ, p-v.by
Фота аўтара
Людміла РЭБКАВЕЦ, p-v.by
Фота аўтара
ЭЛЕКТРОМОБИЛИ" />
